Solicitudes do empregado

Ademais de fichar, desde o panel podes resolver o día a día sen correos nin papeis: todo vive na sección As miñas solicitudes do menú lateral, con tres apartados — Incidencias de fichaxe, Cambios de horario e Teletraballo. As dúas primeiras pasan polo teu responsable ou RRHH; o teletraballo rexístrase no momento, sen aprobación.

Corrixir unha fichaxe: incidencias

Esqueciches fichar a saída ou o reloxo quedou mal? Non edites nada á man: envía unha incidencia e, se se aproba, a corrección aplícase soa.

1. Entra en Incidencias de fichaxe → Nova incidencia.
2. Escolle o día da fichaxe afectada (hoxe ou anterior, aínda que sexa de hai meses) e preme Ver as fichaxes dese día: verás as que tes ese día.
3. Escolle o tipo e enche o que pide:
   • Esquecín fichar a entrada / Esquecín fichar a saída: non escollas ningunha fichaxe; indica só a hora que falta.
   • Fichaxe con hora incorrecta: escolle a fichaxe dese día e indica o tipo (entrada ou saída) e a hora correctos.
   • Fichaxe duplicada (anulala): escolle a fichaxe que sobra; non fai falla hora.
   • Outro motivo: se propós tipo e hora, aplícanse ao aprobarse; se non, queda constancia do teu desacordo sen cambiar o rexistro.
4. Escribe unha xustificación. As horas van na zona horaria da túa empresa.

Cando o teu responsable a aprobe:

• Un esquecemento crea a fichaxe que faltaba; unha hora incorrecta corrixe a fichaxe que sinalaches; un duplicado anúlaa (consérvase marcada e deixa de contar, nunca se borra).
• Se esa fichaxe que faltaba a gardara o móbil ou o navegador sen conexión e chega despois de aprobarse, con outra hora a menos de 5 minutos, conta a gardada: a engadida anúlase (segue á vista en O meu rexistro de xornada) e a incidencia di que esa fichaxe se anulou despois.
• Outro motivo sen proposta non cambia nada: queda constancia de que se che deu a razón.
• Se a fichaxe chegou do móbil cunha hora dubidosa (o reloxo do móbil cambiou entre fichar e envialo), quen a aproba fixa a hora real e consta que a fixou esa persoa.

Cada corrección aprobada queda no rexistro de auditoría co valor anterior, o novo, quen a aprobou e a túa xustificación. É o que esixe a normativa de rexistro de xornada: o histórico nunca se pisa en silencio.

Se ninguén máis te xestiona (es a única persoa da administración, aínda que haxa RRHH: RRHH non xestiona a administración), ninguén máis pode aprobar as túas incidencias: o formulario pídeche un motivo (20 caracteres como mínimo) e queda rexistrada ao teu nome no acto, coa marca de que non houbo outro aprobador, á vista da representación do persoal e da Inspección. As que xa teñas pendentes rexístranse igual desde a lista.

O que pidas e non se aplique (pendente ou rexeitado) aparece en O meu rexistro de xornada como discrepancia, co motivo da empresa, e tamén no envorcado para a Inspección.

Podes seguir o estado de cada incidencia (pendente, aprobada, rexeitada ou retirada) na mesma pantalla. Mentres está pendente, podes retirala cun motivo (por exemplo, se a pediches por erro ou a fichaxe xa está ben): non se borra nada e consta como retirada. Máis sobre a fichaxe diaria en Fichar.

Pedir un cambio de horario

Se necesitas traballar con outro horario — uns días ou para sempre — solicítase desde Cambios de horario → Solicitar cambio:

1. Escolle un dos horarios xa definidos na túa empresa (créaos administración en Horarios).
2. Marca o alcance:
   • Puntual: indica data de inicio e data de fin.
   • Permanente: só data de inicio.
3. A data de inicio debe ser hoxe ou futura, e engade o motivo.

Ao aprobarse, o novo horario asígnaseche nas datas pedidas e as asignacións que se solapen recórtanse automaticamente.

Os cambios puntuais revértense sós. Se o cambio substitúe temporalmente o teu horario habitual, ao día seguinte da data de fin volves de forma automática ao teu horario de sempre — non fai falta unha segunda solicitude para "desfacer" o cambio.

Como nas incidencias, verás na lista o estado de cada solicitude e quen a resolveu.

Planificar días de teletraballo

Se a túa empresa ten habilitado o teletraballo (actívase en Axustes de empresa, xunto co límite semanal), en Teletraballo podes marcar as xornadas que traballarás en remoto:

1. Escolle a data (hoxe ou futura) e preme Rexistrar teletraballo.
2. A pantalla móstrache cantos días levas usados esta semana e o máximo permitido ("Esta semana: 2 de 3 días de teletraballo").
3. Cambio de plans? Podes anular calquera xornada túa que aínda non chegase.

Regras que aplica a plataforma ao rexistrar:

O límite semanal compróbase sobre a semana da data escollida, non sobre a semana actual: podes planificar varias semanas por adiantado e cada unha respecta a súa propia cota.

As fichaxes dunha xornada marcada como teletraballo quedan etiquetadas como remotas (unha quenda que pasa da medianoite conta como xornada do día en que comeza), así que en informes e presenza distínguese quen traballou desde a casa.

Relacionado

• Primeiros pasos — configuración inicial da empresa.
• Ausencias e vacacións — para faltar un día enteiro, usa unha ausencia, non unha incidencia.
• Horarios — como administración define os horarios que podes solicitar.